القائمة الرئيسية

الصفحات

لماذا تتعلم كلاسيك كننرول ( Why you Learn Classic Control)

 لماذا تتعلم كلاسيك كننرول 

السلام عليكم ورحمة الله وبركاته / معاكم ابراهيم الخطيب مهندس كنترول … زي ما وعدتكم اننا هنبدأ كورس كلاسيك كنترول هنتكلم فيه بعض التفاصيل والاسرار في المجال ده ، خلال الكورس هنتعلم مع بعض حاجات كتير وهنعرف شوية تفاصيل مستخبية محدش بيتكلم في الكورسات الموجودة علي النت وده هيكون أهم ميزة في الكورس علشان كده سميته أسرار الكلاسيك كنترول ، أتمني كل الناس تتابع الكورس أتمني ان الناس تدعم المحتوي بالتفاعل والشير ، عاوز الكورس يوصل لأكبر عدد من الناس وان شاء الله الدنيا لو مشيت تمام ، هيكون ده أول كورس من اربع كورسات في مجال الأتوميشن ، هما:

1.      Classic Control Secrets

2.      PLC Secrets

3.      HMI Secrets

4.      Full Automation Project

نبدأ بأول محاضرة واللي هنتعلم فيها شوية معلومات مهمة جداً ، عن أهمية مجال الكلاسيك كنترول ، ورقتك وقلمك وكباية الشاي الجميلة و يللا بينا نبدأ:

هي ايه فائدة الكلاسيك كنترول ؟

هل ينفع أتعلم PLC بدون ما اتعلم Classic Control ؟

في الحقيقة آه ينفع تتعلم برمجة الPLC بدون ما تاخد كلاسيك كنترول ...

 تمام طيب ايه بقي أهمية الكلاسيك كنترول معايا  ؟

1.      في الحقيقة ده هيتربط برضو بمدي فهمك لمنظومة التحكم الالي بمعني انك لما تبص في الControl loop هتلاقي ان الPLC بيمثل الكنترولر وانه مش شرط تشتغل PLC أًصلا لانك ممكن تتعامل بأي كنترولر تاني سواء هتعتمد هنا علي الريلاي لوجيك اللي هو اسم تاني للكلاسيك كنترول ، أو هتستخدم كنترولر جاهز زي العدادات بأنواعها وده بيكون مطلوب في أوقات كتير ..  حسب متطلبات تشغيل الماكينه أو السيستم بتاعي.

2.      في أوقات تانيه .. ممكن أحتاج أخفف الضغط شوية من علي الPLC زي مثلاً اني ممكن أستخدم عدادات حرارة أو عدادات وزن كحل بديل لتركيب كروت أنالوج  .. أوكي  ... ايه تاني  ؟   

3.      أحياناً بحتاج اني اقلل التكلفة شوية لان عدد نقط الPLC بيفرق في السعر ونوع الPLC هل هو Compact ولا Modular  اللي هو ممكن يخليك تعمل عرض سعر أعلي ويضيع منك المشروع والعكس صحيح ..

4.      سبب تاني اني ممكن أبقي رايح أشتغل علي PLC موجود في المصنع الPLC ده كامل مفيهوش نقط Spare  .. ومطلوب مني أضيف أحمال لازمها تدخل علي البرنامج .. في الحالة دي ممكن أشوف لو عندي أحمال تانيه مش محتاجة PLC  زي سخانات أو مواتير الخ  .... المفروض تشتغل وتطفي مع الباور العمومي في الحالة ممكن أخرجها أعملها دوائر كنترول منفصلة ، علشان أوفر في النقط ، وأقلل في المجهود البرمجي ، والكلام ده شفته في ماكينات كتيره جدا جاية مستوردة من بره.

5.      في بعض الحالات اللي قابلتها كان ناس بتطلب مني أغير الماكينة من PLC لكلاسيك كنترول ، حتي لو كان السيستم شغال ، ممكن تستغرب من الكلام ده لكنه موجود وبيحصل في السوق المصري  ، طيب هو بيعمل كده ليه  ... ايه الهدف من الموضوع ده  ... الهدف من انه يغير من PLC لكلاسيك أنه بيكون المعرفة بتاعته أسهل والعميل يقدر يتعلم الصيانه الكهربية بتاعت المكن اللي عنده ، كمان مصنعي الماكينات بيفضلوا ان الماكينات بتاعتهم تشتغل كلاسيك كنترول كلما أمكن لأنهم بيبقوا ميكانيكا وبتوع الميكانيكا بيقدروا يتعلموا كلاسيك كنترول انما بالنسبة لهم الPLC معقد  شويتين ...

6.      كل ده غير أن الكلاسيك كنترول مش حاجه ضعيفه زي ما هو منتشر بالعكس انتا تقدر بالكلاسيك كنترول تعمل مشاريع محترمه مصانع كاملة زي مصانع الأعلاف مثلاً فيه كتير منها شغال كلاسيك كنترول بالكامل ،  والدنيا تمام مفيش أي مشاكل

أه الPLC هيضيف كتير خصوصاً لأصحاب المصانع اللي بيهتموا بالانتاجية دايما عاوزين يراقبوها ويحسنوا ويطوروا من الانتاج ، لكن لو Scale المصنع صغير بيفضلوا انهم يجيبوا فني صيانه بيكونوا أكتر واسهل اني اجيبهم وكمان أرخص  .

7.      لو انتا مهندس ومعاك فنيين كهرباء ، دورك الاشرافي علي الفنيين دول من الحاجات المهمة جداً يعني لو معاك فني وشغال قدامك في اللوحة وانتا مش فاهم هو بيعمل ايه فده في حد ذاته مش هينفع يحصل أبدا أوعي تحط نفسك في موقف زي ده.

8.       كمان قطع غيار الكلاسيك من كونتاكتور وريلاي وتايمر وخلافه  ، بيكون سهل توفيرها في المصنع  ولو مش متوفرة بيكون سهل أجيبها علي عكس قطع غيار الPLC ... أحياناً المصنع بيقف يوم واتنين وتلاته بسبب قطع الغيار أو المهندس اللي هييجي يحل العطل وحتي في مصانع كبيره أحياناً الماكينات بتقف بسبب قطع الغيار ، لأن كمان في مشكلة كبيرة جداً في الموضوع ده بسبب الكمية المهوله من المصنعين زي سيمنز وميتسوبيشي والين برادلي ودلتا وال اس الخ ، وشفت أكتر من مره ان انتاج مكن واقف بالاسابيع لاننا منتظرين قطعة الغيار تيجي من الصين ولا ايطاليا ولا تركيا ، لانها مش متوفرة في مصر لاسباب زي ان الانتاج بتاعها وقف ونزل اصدار احدث وده اللي متوفر في مصر ، أو هيا اصدار حديث واللي موجود في مصر اصدار قديم وفي الحالة اما اني انتظر واما اني اجيب مهندس او شركة تعملي اتوميشن الماكينة من الأول ،  وده بيحصل كتير يبقي من الأول لو المكنة تنفع كلاسيك يبقي من الأول منا عملناها كلاسيك (أنا بنقلك وجهة نظرهم مش معني كده اني موافق أو مش موافق).

وده بيفرق مهندس عمل نفس البروجيكت قبل كده يعني عندي حاجه مهمه اسمها خبرة التطبيق الخبرة بتاعت ماكينات حقن البلاستيك كمثال ، وده اللي بيميز الشركات عن بعض بشكل كبير يعني هتلاقي شركات شاطره في شغل البلاستيك شركات شاطره في شغل الغزل والنسيج شركات شاطره في الاعلاف ومصانع الخرسانه وهكذا ...

 

 

يبقي نطلع بايه من الكلام ده  ... 

انتا لو عاوز تبقي مبرمج PLC شاطر مش شرط تتعلم كلاسيك كنترول.

لكن لو عاوز تبقي مهندس أتوميشن أو مهندس صيانه شاطر مفيش أصلاً مجال للتفكير انك ما تتعلموش وكمان تحترفه ..

طيب عرفنا فايدة أهمية الكلاسيك كنترول ؟؟

ازاي أبقي محترف كلاسيك كنترول ؟؟

هنا ييجي دور الكورس بتاعنا ، مش هقولك تتوقع انك بمجرد دراستك للكورس هتكون محترف في الكلاسيك ، ده مش حقيقي ومفيش أي كورس هيوصلك لمرحلة الاحتراف لأن ببساطة عملية التعلم عموما في أي مجال مش مقتصرة علي تلقي المعلومات فقط مهما كانت المعلومات دي كامله ومركزه  ، لابد من ممارسة اللي احنا هنشرحه في الكورس وانا هتبع أسلوب اني ادي أمثلة عملية قدر الامكان بعد الشروحات النظرية المهمة.

يبقي بعد الكورس المفروض ان حضرتك هتكون قادر تمارس الكلاسيك كنترول بسهوله يعني الكورس هيحطك علي أول الطريق تقدر من بعده تشتغل في المجال ده  ، وتقدر تكمل دراسة في مجال الأتوميشن بعد كده. 

وهنا هنقول ملحوظة تانيه:

خلي بالكم أن مجال الأتوميشن انتا بتكون مهندس سوفتوير + هاردوير ... لما تيجي تدرس PLC لو انتا مش دارس كلاسيك موضوع الهاردوير سواء كان بالنسبة للتوصيلات الكهربية أو الCommunication هيكون بالنسبه لك خيال علمي وهتتعب علشان تتعلمه اللي هو ممكن تحتاج ترجع تدرس كلاسيك كنترول تاني ويبقي ضيعت وقتك ومجهودك عالفاضي ...

لكن لو قدامك فرصة ودي أنا مشفتهاش في مصر انك تشتغل مبرمج فقط يعني كل شغلك انك بتروح المكتب الصبح تعمل تاسكات عباارة عن أكواد فقط دون أي احتكاك بهاردوير في الحالة دي توكل علي الله وادرس PLC علي طول.

أتمني يكون الموضوع واضح للجميع لأن الكلام ده مهم جداً... 

نظام الكورس:

1.      المفروض ان حضراتكم هتشوفوا الحلقات ، المطلوب منك تهتم بكل الكلام اللي بنقوله خلال المحاضرة وتخلي معاك ورقة وقلم للملاحظات والاسئلة كأنك في محاضرات عادي.

2.      لو فيه أي استفسارات أو أسئلة هتكون من خلال التعليقات علي اليوتيوب أو جروب الفيس بوك.

3.      أحياناً هننزل بعض التحديات البسيطة اللي هتكون عبارة تمارين عن تعديلات أو زيادات للدوائر اللي هنعملها في المحاضرات زي مثلاً اننا نعمل موتور بيشتغل من مكان واحد ونطلب ان الناس تعمله يشتغل من أكتر من مكان .. الحاجات اللي زي كده هتحلها وتنزلها علي جروب الفيس بوك.

4.      لو فيه وقت هعمل سكربت للحلقات ولو فيه أي ملفات محتاجة تحميل هيتم رفعها علي الموقع الخاص بينا www.plcsecrets.com وهسيب كل الروابط في الDescription / أول تعليق.

5.      اخر حاجه ، أنا بشارك معاكم المعلومات اللي اتعلمتها سواء في دراسة أو شغل دعمكم ليا هيكون أولا بالدعاء ثانياً انكم تشاركوا المحتوي مع أصحابكم علشان الكل يستفيد وعلشان ده هيشجعني اني أعمل فيديوهات وكورسات أكتر.

 

كده درس انهارده خلص أتمني الناس تكون استفادت من الدرس … ما تنسوش تعملوا لايك واللي معلمش Subscribe يعمل ويفعل زر الجرس ، 

والسلام عليكم ورحمة الله وبركاته.


 أسيبكم مع الفيديو 



تعليقات

عن المدونة

مدونة أسرار المتحكم الصناعي كانت فكرة قديمة تمنيت وجود شيء مثلها يقوم بتعليم المفاهيم والأسرار الخاصة بعالم التحكم الصناعي باللغة العربية . حيث أن كل المحتوي العربي الموجود يتحدث عن الأوامر البرمجية فقط ولا يقوم بتعليمنا المفاهيم التي ترسخ البرمجة في أذهاننا ، ولذلك قررت أن ابدأ في انشاء الفكرة للمساهمة ولو بجزء بسيط جداً في اثراء المحتوي العربي في عالم التحكم الصناعي . سوف أتحدث عن المتحكمات المنطقية ، الشاشات الصناعية ، مغيرات السرعة ، أنظمة الاسكادا ، أيضاً سوف احاول توفير روابط لأهم الكتب العربية والاجنبية في عالم الكهرباء بشكل عام والتحكم الصناعي بشكل خاص . أسأل الله أن ينفعني وينفعكم بهذا العمل ولا تنسوني من صالح دعائم.
التنقل السريع